Жаҳон опера саҳнаси юлдузлари Анна Нетребко ва Юсиф Эйвазовнинг Тошкентдаги илк маротаба чиқишлари

24 июль, соат 18-00 да Тошкентдаги А.Навоий номли ДАКТда опера юлдузи, жаҳоннинг деярли барча етакчи опера театрлари асосий партиялари ижрочиси, Россия халқ артисти Анна Нетребко ва таниқли тенор, Озарбойжон халқ артисти Юсиф Эйвазовлар илк маротаба яккахон концертлари билан томошабинларни хушнуд этадилар. Классик санъат кечасининг  ташкилотчиси Ўзбекистон Республикаси Маданият вазирлигидир.
Таниқли артистларнинг чиқишлари энг ёрқин ёш россиялик дирижёрлардан бири Денис Власенко бошқарувидаги Ўзбекистон Миллий симфоник оркестри ижроси остида ўтади. Франциялик ижрочи Людовик Тизье (LudovicTezier, баритон) ва россиялик опера қўшиқчиси Елена Жидкова (меццо-сопрано) кечанинг махсус меҳмонлари бўладилар. Анна Нетребко ва Юсиф Эйвазов юлдузли жуфтлигининг биргаликдаги чиқишлари бутун дунёда асл санъат шайдолари ва опера санъати ихлосмандларини доим ўзига ром этиб келган. Шубҳасиз, Тошкент учун бетакрор оилавий ва ижодий иттифоқ вакиллари, жаҳон опера саҳнасининг энг ёрқин намояндалари чиқишлари жорий ёз ойларининг асосий воқеаси бўлади.
Анна опера юлдузи ҳақидаги тасаввурларни тамоман ўзгартириб юборди. Ўта чиройли овоз, нафис латофат ва ром этувчи актёрлик ижроси, у қайси ролни ижро этмасин, хотирада ўчмас из қолдиради. У классик мусиқа дунёси мусиқачилари орасида биринчи бўлиб “Time 100” рўйхатига – “Time 100” журнали фикрига кўра дунёнинг энг машҳур инсонлари рўйхатига кирди.
Нетребко бутун дунё бўйлаб, масалан, Нью-йоркдаги “Карнеги-холл” каби номи чиққан мусиқа залларидан тортиб ўн минглаб кишиларни сиғдира оладиган катта саҳналарда мунтазам равишда концерт беради. Унинг мовий осмон остидаги концертлари кўлами кенг: Берлиндаги “Вальдбюне”дан то Москвадаги Қизил майдонгача. Мазкур концертларда Анна билан бирга Пласидо Доминго ва Дмитрий Хворостовский каби артистлар қўшиқлар ижро этганлар. Анна ўзининг устози, дирижёр Валерий Гергиев билан ҳамкорликни давом эттириш учун Санкт-Петербургдаги Мариинск театрига тез-тез ташриф буюриб туради.
Ўтган мавсум Анна замонамизнинг опера примадоннаси сифатидаги обрў-эътибори шак-шубҳадан холи эканлигини яна бир бор тасдиқлади: “Ла Скалa” театри мавсуми очилишидаги ўн бир дақиқалик тўхтовсиз қарсакбозлик (“Жанна д’Арк”, Верди), Метрополитен-операдаги дебют яккахон концерт вақтида залнинг лиқ тўлалиги ва Дрездендаги Земпер-опера саҳнасида Вагнернинг “Лоэнгрин”ида биринчи Эльза ғолиблиги! Бошланган мавсум унинг истеъдоди тўлиқ намоён бўлган даврини намойиш этувчи, итальян операларининг афсонавий ариялари ва дуэтларидан ташкил топган “Verismo” янги яккахон альбоми дунё юзини кўриши билан диққатга сазовордир. Унинг Роландо Виллазон билан ҳамкорликда ёзилган “Дуэтлар”, (“Duets”) компакт-диски эса дунёнинг бир қанча мамлакатларида хит-парадларнинг энг юқори чўққисидан жой олиб, классик мусиқа альбоми сифатида рекорд қўйди.
Анна Нетребконинг кўпсонли ютуқлари ва совринлари орасида унинг “Виолетта” ва “Рус альбоми” учун “Грэмми” мукофотига номинацияси ҳам бор.
Юсиф Эйвазов жаҳон саҳнасида пайдо бўлганидан буён унча кўп вақт ўтгани йўқ. Бироқ ўта ширали, бетакрор овози ва зўр актёрлик маҳорати билан жаҳоннинг етакчи опера майдонлари талабчан томошабинларини ўзига ром эта олди.
Юсиф Озарбойжоннинг Баку шаҳрида ўсиб-улғайди ва Баку мусиқа академиясида вокалдан таълим ола бошлади. 1997 йилда таълимни давом эттириш учун Италияга кўчиб ўтади, кўплаб маҳорат дарсларига қатнашади, ҳалқаро танловларда иштирок этади.
Концерт фаолияти ва кичик театрларнинг опера спектаклларида иштирок этишни 2005 йилдан бошлаган ва у ерда ўзининг маҳоратини ошириб борган.
Юсифнинг чиқишлари географияси Европа ва Америка билангина чегараланмайди. 2016 йилнинг баҳорида Юсиф Анна Нетребко билан Осиё мамлакатлари бўйлаб ҳамкорликдаги концерт сафаридан сўнг осиёликларнинг меҳрига сазовор бўлди.

Людовик Тизье ­– жаҳон операсининг етакчи хонандаларидан бири. 1968 йилда Марселда туғилган. Хонанданинг операдаги кўтарилиши Лион операсидан бошланган, сўнгра у бошқа жаҳон театрлари саҳналарида чиқа бошлади (Метрополитен-Опера, Ла Скала, Бавария давлат операси, Вена давлат операси, Мадриддаги қироллик театри, Барселонадаги Лисео театри, Марсель ва Париж опералари).
Елена Жидкова – Петербург консерваторияси битирувчиси. Сўнгги йилларда Николаус Арнонкур, Валерий Гергиев ва яқинда вафот этган Клаудио Аббадо каби машҳур дирижёрлар билан чиқишлар қилган. Берлиндаги немис операсида дебют қилганидан сўнг уни Вагнер Байтройт фестивалига таклиф этишди ва айнан Вагнер операларидаги партиялар унинг репертуари асосини ташкил этди.

2017 йил 13 июль

13 июля 2017