«Хумо», А.Эргашев

Икки пардали ва беш кўринишли, прологли балет.

Либретто: В.Сергеевники.

Саҳналаштирувчи балетмейстер: Халқ артисти, Грузия давлат мукофоти совриндори, профессор Георгий Алексидзе.

Мусиқий раҳбар ва дирижёр: Ўзбекистонда хизмат кўрсатган санъат арбоби, Давлат мукофоти совриндори Анвар Эргашев;

Саҳналаштирувчи расом: Грузияда хизмат кўрсатган санъат арбоби Юрий Гегешидзе.

Спектакль давомийлиги: 1 соат 45 дақиқа.

А.Навоий номидаги ДАКТ саҳнасида илк премьера 2005 йилда бўлиб ўтган.

Спектакль Ўзбекистон Республикаси Давлат геральдикаси рамзи - Ҳумо қушига бағишланган. 2 пардали романтик эртак-балет. Спектакль мусиқаси учун муаллиф 2007 йилда 1-даражали Давлат мукофоти совриндори унвонига сазовор бўлди.

Ҳумо – сеҳрли қуш-пари, гўзаллик, бахт ва севги афсонаси, ерга қўнгач, ўз патларини ташлаб, қизларга айланувчи мўъжизавий қушлар подшоҳлиги йўлбошчисидир. Моҳир кулол ва ўймакорлик устаси Загар тоғларда кезиб юриб, бу ажойиб воқеанинг устидан чиқади ва  улардан бири - қуш-қиз Зулайҳони севиб қолади. Муҳаббат ғалаба қозониши ва улар бирга бўлишлари учун кўп қийинчиликларни бошдан кечирадилар. Очкўз ҳукмрон Хорун-халифнинг маккорлиги, овчи Мансурнинг ёвузлиги ва бошқалар шулар жумласидандир… Бироқ адолат ғалаба қозонади, Ерда бахт-саодат ҳукмрон бўлади, келажакнинг ажойиб шаҳри бунёд этилади. Ҳамма нарсада бахт қуши Ҳумо ёрдамга келади ҳамда Фаровонлик ва Адолат посбони бўлиб қолади.